RIMANDO CON ROSALÍA E COMPAÑÍA

 Boas rapazada: 

Hoxe traio unha actividade que realizamos para conmemorar o Día de Rosalía de Castro, que como xa sabedes é o 23 de febreiro, e que nesta ocasión e debido á proximidade das datas decidimos conmemorar conxuntamente co Día da Poesía. 

Para isto tivemos a sorte de que a pintora lucense Ana María Rodriguez nos emprestou unhas carátulas de cds nos que aparecía pintada unha muller. 

Nós démoslle ao noso alumnado unha muller a cada aula, e tiveron que investigar quen é e o motivo da súa fama, e despois para traballar a escrita e a poesía  xa que cada quen tiña que facer un pareado relacionado co personaxe.

Unha vez recollidos todos os cds e os documentos cos pareados elaboramos un mural, que podedes ver na seguinte fotografía e que lle chamamos RIMANDO CON ROSALÍA E COMPAÑÍA.  No centro podedes observar de maior tamaño a Rosalía que a traballamos en todas as aulas, dando a coñecer a súa figura e resaltando o seu papel na nosa sociedade e a prol da nosa lingua. 

Agardo que vos guste tanto coma a min!!

Moitas grazas Ana María por facernos este empréstito e xa sabedes para calquera cousiña... Libeteca sempre na biblioteca!!!

CAFÉ CON LETRAS

 Boas rapazada:

Hoxe estou moi leda, xa que foi a primeira xuntanza do noso clube de lectura que chamamos CAFÉ CON LETRAS e como xa sabedes esta vez os asistentes leron o libro de REYES MONFORTE  que se chama UN BURKA POR AMOR, a xuntanza foi moi interesante posto que todas as participantes tanto mestras coma familias, tiveron unha conversa moi enriquecedora tanto do libro como do papel da muller na sociedade, e de diferentes puntos de vista sobre temas de actualidade. 

Xa estamos a argallar a seguinte xuntanza,así que estade atentos que nos vindeiros días informarémosvos de que libro imos ler e cando será a seguinte cita. 

                                        

Moitas grazas a todas por participar e xa estamos a agardar pola seguinte quedada!!

Saúdos Libeteca

XIMCANA DOS ODS

 Boas rapazada:

Dende fai uns días estamos a preparar unha ximcana sobre os ODS. Esta actividade consiste na elaboración duns cartaces que fomos levando ás aulas para que o alumnado prepare esa información, cos lean, e que investiguen sobre os diferentes contidos, e despois, na hora que cada un dos grupos ten asinado para acudir á biblioteca será o día que se realice a ximcana.

Hoxe comezamos as quendas co alumnado de 3ºB que contestaron de maneira correcta 22 das 35 preguntas que tiñamos preparadas para eles. 

O alumnado foi dividido en grupos de catro, e ían collendo preguntas soltas e papel e buscaban as respostas e escribíanas, o alumnado estivo moi motivado e interesado na actividade.

Ao longo da semana iremos poñendo por aquí os resultados dos diferentes grupos, para saber cal é o grupo máis aplicado e que ten un maior número de acertos.

Continuamos recibindo grupos para xogar a nosa ximcana dos ODS, nesta ocasión recibimos ao alumnado de 3º A, que é un grupo de 21 alumnos/as e que seguiron a mesma dinámica ca o grupo anterior. Nesta ocasión, este grupo tivo 18 acertos.Pero o máis importante é o ben que o pasaron e o moito que aprenderon.

 Agora tocoulle a quenda ao alumnado de 5º A que acudíu á biblioteca para xogar a ximcana dos ODS e que pasou un anaco moi divertido e entretido aprendendo sobre os ODS!!

 O derradeiro grupo que participou, polo de agora na ximcana foi o grupo de 2º A que acudíu a biblio para pasar un intre divertido e lúdico no que aprenderon moitas cousas sobre os ODS a través do xogo.

CITA A CEGAS COA LECTURA

 Boas rapazada:

Hoxe estou moi contenta porque o pasado día 14 foi o Día do Amor e da Amizade,e por isto tiven unha cita con todos e cada un de vos. Foi unha CITA A CEGAS COA LECTURA e foi unha actividade que tivo dúas partes, por unha parte todo o alumnado recibíu un agasallo, que foi un libro expurgado da biblio que estaba envolto en papel de xornais e que non podiamos ver nada, de aí o no nome da cita a cegas, e por outra banda creamos uns murais cheos de sobres de cor vermella cos nomes de todo o alumnado e o profesorado e onde debiamos por unha mensaxe bonita, un debuxo, unhas palabras fermosas… a un compañeiro/a .

Aproveitamos esta actividade para traballar a lectura e para escribir a biblioteca escolar.

Agardo que vos gustase esta actividade tanto coma a min e que gozasedes moito deste Día do Amor e da Amizade!!!

CAFÉ CON LETRAS

 Boas rapazada:

Hoxe estou aquí para facerlle un convite ás familias, tratase dunha actividade que imos levar a cabo na nosa biblioteca, xa que imos facer UN CAFÉ CON LETRAS e isto consiste en compartir un anaco do noso tempo ao redor dun café e regado con letras e para isto aqueles que desexedes teredes que ler un libro, concretamente nesta ocasión imos ler UN BURKA POR AMOR de Monforte Reyes.

E posteriormente o martes día 7 de marzo xuntarémonos para compartir as nosas impresións.

Agardo que vos animedes a participar, e non vos esquezades de confirmar a vosa asistencia enviando unha mensaxe ao noso correo.

Un saúdo Libeteca.

VISITA DE PILAR LÓPEZ, UNHA MISIONEIRA DE MANS UNIDAS

 Boas rapazada:

O pasado venres 10 de febreiro o alumnado de 5º e 6º  tiveron a visita de Pilar López, unha misioneira que colabora con Mans Unidas en proxectos de sustentabilidade na República Dominicana.

Resaltou a labor de sacar aos nenos das rúas e ofrecerlles un lapis,un caderno e unha escola para poder ter un futuro mellor.

Tamén falou do problema da falla de auga e os proxectos de potabilización da mesma para as familias da zona. Todo relacionado cos ODS e a axenda 2039.

Quedou moi contenta polo interese amosado polos nenos e nenas e polas preguntas tan interesantes que lle fixeron.

Grazas Pilar por darlle visibilidade a esta realidade.

Saúdos 

Libeteca

ENTREGA DE PREMIOS DO CONCURSO DE POESÍA E POSTAIS DE NADAL DO CONCELLO DE OUTEIRO DE REI

 Boas rapazada:

Hoxe estou moi leda posto que onte foi a entrega de premios do concurso de poesía e de postais de Nadal organizada pola biblioteca Municipal do noso Concello. 

A verdade é que estou moi orgullosa de todos os participantes, xa que fostedes moitísimos os  que participastedes nos concursos, e sobre todo tan quero darlles os meus parabéns a todos os premiados,e agradecer ao Alcalde que nos adique o seu tempo e que lle regalase un libro a cada un dos participantes, xa que agora a miña rapazada poderá gozar do pracer da lectura.

Aquí vos deixo un vídeo que realizou a mestra de 2º Sonia para que poidades desfrutar e revivir connosco este momento.

Moitas grazas ao Concello pola  súa implicación coa nosa rapazada e Parabéns a todos e cada un dos participantes. 

Saúdos, Libeteca.